FASCHINGSPREDIGT PFARRER REGNER

Traditionell am Faschingssonntag steht in Ampfing eine Predigt in Reimform auf dem Programm. Für alle, die diese außergewöhnliche Predigt noch einmal nachlesen möchten, haben wir den Text hier den Text von Pfarrer Florian Regner:

Predigt                                        
(7. Sonntag im Jahreskreis/A, 19.2.2023)
(Lev 19, 1-2.17-18; 1 Kor 3, 16-23; Mt 5, 38-48)

Griaß euch Gott, liabe Leit,

ja, es is wieder Faschingssonntag heit

für den einen a Graus, für den anderen a Freid

durch den Fasching muas a jeder, es tuat ma leid.

Fast drei Jahr war des Faschingsgwand jetza im Schrank

Da wern manche sagn: Ja Gott sei Dank

Zu de Leit sagsn dann: I wär heier so gern wieda dabei

Aber i pass nimmer in mein Faschingsgwand nei.

Für echte Maschkera ist des de scheenste Zeit

san bei jedem Fasching weit und breit

verkleiden sich, hupfen, tanzen, springa

und kenna jeds Faschingslied auswendig singa.

De andern sang, geh ma wieda mit dem Zeig,

i bins ganze Jahr lustig, oder a ned

und mit dem Verkleiden, is des a so a Gfrett

a rote Nosn hock i auf, des is doch a scho ganz nett.

Tusch

Jetzt bin i am unsinnigen Donnerstag am Weiberfasching gwen

von de Männer hat mi da bestimmt koana gseng

lauter Weiber, mei Liaber, da geht’s da nass nei

Gott sei Dank war noch der Kaplan dabei.

Aber oans muas ich sagn, Respekt meine Damen

die Stimmung war zünftig, perfekt war der Rahmen

eine super Musik und alle im scheener Faschingsgwand

und beim Auftritt der Männergarde war der Saal außer Rand und Band.

Tusch

In Ampfing is letzs Jahr a groß Spektakel gwen

1322 – i bin sicher ihr habs es alle gesegn

im Mittelalterfieber war der ganze Ort

Es hat wirklich was verpasst, wer ned gwen is dort.

Salmanskirchen ist dabei a no zum Bischofssitz worn

und an Hargasser hamms zum Bischof erkorn

jetz kennas da draußen vor Kraft nimmer geh

wos no Filiale warn, mei war des schee.

Damit ois guad verlaft, hamma vorher an Bittgang gmacht

sauhoas wars, flott ganga und die Sonna hat glacht

aber es hat gholfen, denn die Festspiele hamm guat klappt

dafür hats vor Hitzn so manchem Ritter sei Gwand sauber pappt.

Tusch

A übrigens des Pappen is jetz a so neie Mode worn

fürs Kleben hamm se die Klimaschützer immer scheene Platzl auserkorn

weils oft lang pappen hamms meistens a Brotzeit dabei

aber a Wurscht war mir lieber wie bloss a Kartoffelbrei.

Jetzt stehts alle mal auf wir machen an Test

ob oana an der Kirchabank klebt fest

bis morgen früh lass man dann schee pappen

dann kommt der Mesner mit am koiden Waschlappen.

Tusch

I hab ja gsagt, des soi a Faschingspredigt sein

deswegen ghört da a jetzt was zu die Lesungen nei

i hoff ihr wards bei die Texte aufmerksam dabei

und habs ned gsagt, da schlaf ihr zwischendurch a bißl ei.

Der Apostel Paulus hat an die Korinther geschriebm

und der Satz is bis heit gültig blim

der Tempel Gottes, des seids ihr alle mitanand

a jeder wie er da sitzt in seim schener Gwand.

Wenn ich jetzt so meinen Blick lass schweifen

dann seh ich bei manchem schon die Gedanken reifen

Was? Mei Mo soi der Tempel Gottes sei

des geht ma jetzt fei gar ned ein.

Bei de Tempel is wia bei die Kircha und de Menschen a

es gibt Große und Kloane, ganz neie und a bißl älterne

und manche Frau denkt, ja so is im Lebm

bei meim Mo hats a scho an Erweiterungsbau gem.

Aber was der Apostel eigentlich woid sogn

das wir alle den Hl. Geist unterm Herzn trogn

und das Christus bei uns dahoam soi sei

ned bloß am Sonntag, sondern allerweil.

Tusch

Liebt eure Feinde, sagt der Herr im Evangelium

ja da druck ma uns gern drumherum

mein Nachbarn, den hab i no nia ned recht megn

a Feind is a ned, aber froh bin i, wenn ihn ned hab gseng.

Des kannt doch a Fastenopfer nach dem Evangelium sei

das ma beim Nachbarn geht durch Gartentürl nei

sagt Grias di, wie geht’s, was machst allerwei

des kannt der Beginn einer neien Nachbarschaft sei.

Tusch

Der Grundner Sepp ist heuer 50 worn

vor am halben Jahrhundert is er also geborn

dafür kummt er no recht flott und dynamisch daher

aber samma uns ehrlich: a jugendlicher Pfarrer macht mera her.

Bisher bin i ja offiziell als Pfarradministrator bekannt

aber jetzt hats sich was gändert, des geb i heute bekannt

da  Kardinal hat mi zum ersten März zum Pfarrer von Ampfing ernannt

des red sie leichter und geht schneller von der Hand.

Was sie ändert? Eigentlich nix groß

außer: So schnell werds mi jetzt nimmer los

und selbst wer a Fassl Fastenbier sauft vollends aus

bringt Pfarrer no eher wie Pfarradministrator raus.

Tusch

Die Faschingspredigt ist jetzt aus

und ihr geht’s dann alle brav nach Haus

sie hat mich mehr als zwei Weisbier kost

ich hoff euch hats gfallen, dann Fasching Prost!

Jetzt geht’s dann naus in die tollen Tage

und führts eich gscheid auf, das mir kommt keine Klage

paar Tag habts no für Konfetti, tanzen und Faschingsfeierrei

denn am Aschermittwoch ist alles vorbei.

Dann kommts wieder rei in die heiligen Hallen

als reuige Sünder und ohne Lallen

und wer moant, aber bißl Buße wär ned verkehrt

für den hab ich scho an Beichtstuhl auskehrt.

3x Tusch

Fotos vom Faschingsgottesdienst (Sepp Sperr)